港妈帮宝贝仔女摆百日宴已成一大潮流，有港妈日前于网上订购以动画《波士BB》为主题嘅candy corner作为仔仔百日宴布置，点知宴会当日店员唔只迟大到，甜品如cupcake、macaron生日帽等完全货不对办，糖皮似泥胶、马卡龙碎到四分五裂，好离谱。
港妈当然唔收货，店方坚持拎走补获再送嚟，点知啲cupcake只係刬走块糖皮再求其唧啲白色cream算，港妈简直嬲到喊，用咗$2,600买咗栈辐射甜品，店家事后仲失埋踪，港妈惟有上网打千字文投诉呢间不负责任嘅甜品店。
唔少网民对都好同情港妈遭遇，纷纷留言:「哗!咁做生意都有」、「去美心买个独角兽蛋糕都冇咁激气」、「学艺未精就唔好出来害人啦」、「冇heart就唔好学人做生意啦」，也有网民突破盲肠:「个仔大个表示完全唔记得有啲咁嘅事。不过真係几嬲嘅…」
问心，百日宴对BB真係咁重要?其实，只係对父母重要吧，而且好多人都有啲唔健康嘅心态:
1.虚荣心
眼见人哋百日宴咁大排场，葡萄之余，觉得自己都不容有失，于是有咁豪得咁豪，场地布置、甜品檯最紧要有得呃like，跟手影多啲相哂靓B，再帮个bb开个page当明星又点话，到头来…只係两公婆自high啫。
2.贪钱
有啲父母会利用摆酒赚钱，之前网上都有个帖文，一位网民个老爷去亲戚搞嘅百日宴，点知当亲戚收齐利是后，居然带班叔伯兄弟去茶餐厅食百日宴，仲好豪咁叫大家随便点，激到个个弹起。
3.咩人都请
BB百日宴，一家人食餐饭就够，唔太熟嘅疏堂亲戚都未必要请，但有啲父母觉得朋友、同事老奉要出席，咩人都请一餐，有网友留言话曾经有同事邀请佢出席百日宴，佢好直接咁讲:「你个仔关我咩事?」
