品牌

几日前无人留意又突然完咗嘅就係大台嘅音乐颁奖礼，不过同港姐一样，由于人气低，好多人根本就唔知发生过；不过今年最多人突然留意嘅係因为「最受欢迎女歌手」，竟然落咗喺菊小姐身上。Who？係呀，成日唱大台剧集歌嗰位菊小姐。当然好多人都会好似吴若希咁大笑，一副「预咗係咁黑暗架啦」嘅心态，但都难免喺社交媒体上造成一股哄动。其实大家又何必上心，讲咩「乐坛最黑暗一日」；喂，乐坛有几时唔黑暗过呢？何况呢个係大台呀。继我话，各位香港家长要为小朋友好，就更加要多啲陪小朋友睇TVB喇。点解？

识人好过识字
菊小姐得奖，对于大家嘅意义就係话畀大家知，呢个社会係重人脉重后台多过实力。当你太废无人要无人睇得起咩？有人造个台畀你上就得啰，无奖摆咩？自己颁畀自己就得啰。话定畀小朋友知，等佢哋及早知呢个世界係点玩，想埋栈嘅就埋栈，唔想埋嘅就要预咗加百倍努力。

人无耻则无敌
喺香港，目前嘅玩法係唔惊畀人话唔惊畀人笑，面皮只要够厚，咩人都耐你唔何。上至高官，下至电视台，只要唔怕样衰，坚持懒死唔改，就无人奈得你何，前题当然你要后台够硬啦。家长就可以教识小朋友，有强权无公理呢个理论喇，第时悭返啖气好过啦。

排斥异己上位
实力唔够人哋劲，咁点算？好简单，只要Foul走人哋咪OK。好似大台咁，唔畀四大唱片公司落场玩，嚟嚟去去都係自己人同啲Friend。社会上又何尝唔係咁黑暗呢，肯企硬做个硬骨头唔埋栈，好多时都係畀人边缘化咗，有腰骨都要讲代价。拣得呢条路行，就预咗比人艰难十倍！